Daisy Adair Davis 

Ngāti Raukawa, Ngāti Maniapoto, Waikato 

Ākonga, Poutuarongo Whakaakoranga 

I whānau mai, ā, i tupu ake a Daisy Adair Davis ki Ōtaki. Ko Maewa Kaihau tōna māmā; kua roa te tū o Maewa hei kaitiaki pukapuka ki Te Wānanga o Raukawa. Nā tēnei, kua maha ngā wā o te nohinohitanga me te taiohitanga, i noho ai a Daisy ki te whare pukapuka, ki te taha o tōna māmā. 

I kuraina a Daisy ki Te Kōhanga Reo o te Kākano o te Kura, Te Kura Kaupapa Māori o Te Rito me te Kāreti o Ōtaki.     

Āianei, he kaiāwhina a Daisy ki Te Kura a Iwi o Whakatupuranga Rua Mano, ā, ko āna tauira he tamaiti kei te reanga tuarua. He ngākaunui nōna ki tēnei mahi, ki ngā tamariki, ki te reo Māori me ōna tikanga hoki. He ākonga hoki ia ki Te Wānanga o Raukawa, ā, kei a ia te tohu Heke Whakaakoranga. Ko te whāinga,  hei te paunga o tēnei tau, ka whiwhi ia i te tohu Poutuarongo Whakaakoranga, hei pouako mō ngā tamariki Māori. 

E ngākaunui ana a Daisy ki te hākinakina. Ko te poitarawhiti, poitūkohu me te pā whutupōro āna kēmu. He kaitākaro, he kaiwhakaako kēmu hoki ia mō te reanga tamariki.   

“… he ngākaunui, he manawanui tōku ki ngā tamariki, ki te reo Māori me ōna tikanga anō hoki.” 

Ko tā Daisy, “Ko te take i whiriwhiri au i tēnei tūranga mahi mōku nā te mea he ngākaunui, he manawanui tōku ki ngā tamariki, ki te reo Māori me ōna tikanga anō hoki.” Ko ōna whakaaro mō Te Wānanga o Raukawa, “He maha ngā momo taonga kua takoha mai tēnei Wānanga ki ahau. Ko te take matua i whiriwhiri au i tēnei Wānanga, kei Ōtaki ahau e noho ana. E noho pātata ana au ki te whare nei. He ngāwari te whakamahi i ngā rauemi, te kōrero atu ki ngā kaiako me ngā pūkenga o te whare nei. Anō hoki kua tupu ake au ki tēnei kaupapa. Nā reira kāre he wāhi tū atu mōku.” 

“Me kuhukuhu mai te katoa. Te katoa e ngākaunui ana ki ngā tamariki, ki te ao Māori, ki ōna tikanga, kia ora ai tō tātou reo.” 

Mō Te Wānanga o Raukawa, e akiaki ana a Daisy kia “... kuhukuhu mai te katoa. Te katoa e ngākaunui ana ki ngā tamariki, ki te ao Māori, ki ōna tikanga, kia ora ai tō tātou reo.” 

Mēnā, e hiahia ana koe ki te mōhio ki ētehi atu kōrero e pā ana ki te Poutuarongo Whakaakoranga, whakapā mai ki a Mereana Winterburn, mereana.winterburn@twor-otaki.ac.nz 

Mō ētehi atu kōrero e pā ana ki ngā tohu o Te Wānanga o Raukawa, toro atu ki https://www.wananga.com