Kaupapa kōrero: Te Pakanga mō te reo Māori – He tirohanga nō ngā Kura Kaupapa Māori Aho Matua o Aotearoa

Koni atu i te 40 ngā tau a Rawiri Wright e mahi ana i te ao mātauranga. Mai i te kōhanga reo tae ki ngā taumata o te kuratini, te whare wānanga me ngā wānanga a kura, a hapū, a iwi anō hoki - kua kauwhautia e ia mō te aho matua o ngā kura kaupapa māori o Aotearoa, te hītori o te pūnaha mātauranga o Aotearoa me ngā whakaakoranga a Paolo Freire.

E ai ki tēnei uri o Ngāti Raukawa ki te Kaokaoroa i Patetere, Te Arawa me Ngāti Kahungunu ki Te Wairoa - ko te ao mātauranga tētahi o ngā tino āhuatanga i ngaro, i aupēhi ai tātou te iwi Māori nā reira mā te ara mātauranga anō tātou e whakawātea, e whakakaha, e whakaora, kia ū mai anō ki a tātou te Māori tō tātou tino rangatiratanga i roto i te ao mātauranga.

I tēnei wā, ko Rawiri te tumuaki o Te Kura Kaupapa Māori o Ngā Mokopuna ki Te Whanganui a Tara, ā, ko rāua ko Tākuta Cathy Dewes ngā tumuaki takirua o Te Rūnanga nui o Ngā Kura Kaupapa Māori o Aotearoa.

   He uri ahau nō Te Tairāwhiti, he manu pīrere ahau nō Te Kōhanga Reo, he raukura ano hoki nō Te Aho Matua. He mea whāngai ahau e ōku pākeke, he Pāpā ahau, he ringa hāpai kaupapa whakarauora.