HE REO PŌWHIRI KIA TŪHONO MAI TE PĀHOTANGA MATAORA!
Te Wero a Te Ouenuku Rene
Tihei mauri ora! Tēnei au, tēnei au Te Rōpū o Te Reo Māori e pōwhiri atu nei kia hono ā-ipurangi mai koutou ki te whakanuitanga o te huringa tau 50 o te Pitihana Reo Māori, ka tū ki raro i te marumaru o Te Wānanga o Raukawa.
Hei te 13 o Hepetema, ka whakapāho mataoratia atu ki tāna pae tukutuku (Te Wānanga o Raukawa), 9am-8pm. Mehemea ko te reo te kaingākau, tēnā tūhono mai ki tēnei hokinga mahara ki te kaupapa, nāna anō te whakarauoratanga o te reo ki te motu whānui i whakarewa!
Ka maumahara rawa ki te ruānuku rā ki a Te Ouenuku Rene, nāna te hīkoi ki Te Whare Pāremata i arataki. Nāna rawa hoki ngā karakia i taki, i mana ai te whakatakotoranga o Te Pitihana Reo Māori ki mua i te aroaro o Whetu Tirikatene, o Matiu Rata, o Paraone Reweti mā.
Tūhono mai rā ki te karanga a Te Rōpū o Te Reo Māori!
Kia whai wāhi mai rā koutou ki ngā whakamaharatanga, ki ngā whakanuitanga, ki ngā whakakoakoatanga o te rā. Whakarongo mai ki ngā whakawhitiwhitinga kōrero, ki te rārangi pūkōrero ka tū ake ki te whiriwhiri, ki te whakautu i ‘Te Wero a Te Ouenuku Rene’, he mea whiu nāna ki a mātou te hunga ākonga o te wā:
“Tera te Atua e patai ki a tatou, i pewheatia e koutou te reo rangatira i hoatungia na e au ki a koutou?”
